एमालेको ‘जागण सभा’ केका लागि ?

काठमाडौं । नेकपा एमालेको ‘जागरण सभा’ काठमाडौँको दरबारमार्गमा सम्पन्न भएको छ । काठमाडौं, ललितपुर र भक्तपुर तीन जिल्ला कमिटीको आयोजनामा एमालेले जागरण सभा गरेको होे ।

यसअघि भृकुटीमण्डपमा गर्ने भनिएको सभा स्थान परिर्वतन गरी दरबारमार्गमा गरेको हो । सरकारको नेतृत्व गरिरहेको दल नेकपा एमालेले काठमाडौंमा उसैगरी तामझामका साथ ‘जागरण सभा’ गरेका हुन् ।

नागरिकमा बढ्दो निराशा र अराजकताका कारण विधिको शासन र कानुनी राज्य कमजोर बनिरहेको निष्कर्ष सहित एमालेले सभा गर्नुपरेको महासचिव शंकर पोखरेलले बताए । महासचिव पोखरेलले सभा मार्फत् नागरिकमा आशा जगाउनको लागि जागरण सभा गरेको प्रष्टोक्ति पारे ।

प्रधानमन्त्री केपी शर्मा ओलीले आफू नेतृत्वको वर्तमान सरकार र एमालेविरुद्ध कसैले केही गर्न नसक्ने विश्वास दिलाए । ‘अहिलेको सरकार र नेकपा एमालेलाई कसैले हल्लाउन सक्ने छैन, प्रधानमन्त्री ओलीले भने । प्रधानमन्त्री ओलीले ०८४ को मंसिरसम्म अहिलेकै वर्तमान समीकरण रहिरहने दाबी गरेका छन् ।

प्रधानमन्त्री ओलीले आफूमाथि लागेको आरोपहरू खण्डन गर्न पनि लायक नरहेको बताएका छन् । जनता कसैको भ्रममा नपर्ने उल्लेख गर्दै ओलीले कसले कति कमाएको छ, छैन जनतालाई थाहा भएको तर्क गरे ।

कम्बोडियाको टेलिकममा प्रधानमन्त्री ओलीको लगानी रहेको भन्ने आरोपको खण्डन गर्दै ओलीले समाजमा घृणा फैल्याउने चेष्टा भइरहेको बताए । ओलीले यस्ता गतिविधि गर्नेलाई नियन्त्रणमा ल्याइने समेत चेतावनी दिए ।