गौरीशंकरका तीन उम्मेदवार एकै ठाउँमा, एकअर्कामा बधाई दिदै सहयोग गर्न आग्रह

काठमाडौं । आगामी मंसिरमा हुने उपनिर्वाचनका उम्मेदवारहरु प्रचारप्रसारका क्रममा एकै ठाउँमा भेटघाट भएका छन् । उपनिर्वाचनका लागि गौरीशंकर गाउँपालिकामा सिफारिस भएका मुख्य राजनीतिक दलका उम्मेदवारहरु नेकपा एमालेकी उमा लुङ्गेली मगर शेर्पा, नेपाली कांग्रेसकी पासदिकी शेर्पा तामाङ र एकीकृत माओवादी केन्द्रकी निमलेकी शेर्पा चुनावी अभियानका क्रममा एकै ठाउँ भेट भएका हुन् ।

आगामी मंसिर १६ गते हुने उपनिर्वाचनका चुनावी अभियानका क्रममा तीनै जना उम्मेदवारहरु एकै ठाउँमा भेट भएका हुन् । उनीहरुले चुनाव प्रचारप्रसार गर्न काठमाडौंमा रहेका गौरीशंकरका स्थानीय मतदातासँग भेटघाट तथा घरदैलो अभियान सुरुगरेका छन् ।

उनीहरु बीच भेटपछि एकआपसमा जितको शुभकामना र सहयोगको अपिल गर्दै हार्दिकता दर्शाएकी छिन् । एमालेकी उम्मेदवार उमा लुङ्गेली मगर शेर्पाले कांग्रेसकी उम्मेदवार पासदिकी र माओवादी केन्द्रकी उम्मेदवार निमलेकीलाई सहयोगका लागि आग्रह गरेकी छिन् । उमाले “यस उपचुनावमा मलाई सहयोग गर्नुहोस्, हामी एउटै गाउँ टोलका नागरिक हौँ, पालिका, वडा र आफ्नो टोलमा आवश्यक विकासका कामहरु सँगै मिलेर गर्नुपर्छ र तपाईहरुलाई परेको सहयोग म गर्छु’ भनेर भेटमा सहयोगको आग्रह गरिन् ।

उपनिर्वाचनका लागि नेपाली कांग्रेसकी उम्मेदवार गौरीशंकर–६, चंखु र एमाले र माओवादी केन्द्रकी दुइ जना उम्मेदवार गौरीशंकर–७, मार्बुका एउटै वडा र टोलका हुन् । उनीहरु बीच एकआपसमा सद्भाव , चिनजान र आफन्त नातेदार नै भएकाले सहयोगको याचना गरेकी हुन् ।

पालिकामा हुने उपनिर्वाचनको लागि नेकपा एस, राप्रपा र अन्य राजनीतिक दलहरुले समेत उम्मेदवार घोषण गरिसकेको छ । गौरीशंकर गाउँपालिकाका उपाध्यक्ष श्यामसुन्दर तामाङको २०८० असार ३१ गते हृदयघातका कारण निधन भएपछि सोहि पदमा उपनिर्वाचन हुन लागेको हो ।