१
Advertisement
दोलखा । बाढी पहिरोबाट क्षतिग्रस्त माथिल्लो तामाकोशी जलविद्युत केन्द्रको संरचना पुनः निर्माणका लागि करिब दुई अर्ब भन्दा बढि खर्च लाग्ने भएको छ ।
केन्द्रको क्षतिग्रस्त संरचनाको पुनः निर्माण गरि विद्युत उत्पादनलाई पुर्ण रुपमा सञ्चालनमा ल्याउन २ अर्ब ५० करोड खर्च लाग्ने केन्द्रले जनाएको छ । बाढीले दुई अर्ब बढिको क्षति भएको अनुमान छ ।
बाढी पहिरोले माथिल्लो तामाकोशी जलविद्युत केन्द्रको बाँधतर्फको अधिकांश संचरनामा क्षति पुुगेको र सिभिल तथा हाईड्रोईलेक्ट्रिक मेसिनरी तथा उपकरणमा क्षति हुँदा करोडौँको घाटा भएको छ ।
बाढीका कारण ६ वटा युनिटको विद्युत उत्पादन बन्द हुँदा गत महिना मात्रै ८५ करोड बराबरको घाटा भएको अनुमान छ । आयोजनाबाट २१ करोड ४३ लाख युनिट विद्युत उत्पादन हुन नसक्दा गत महिना मात्रै ८५ करोड घाटा भएको नेपाल विद्युत प्राधिकरणका प्रवक्ता चन्दन कुमार घोसाले जानकारी दिनुभयो । आगामी मंसिरदेखि प्लानिङ साईटबाट केही विद्युत उत्पादन गर्ने गरि काम भईरहेको उहाँको भनाई छ ।
प्राधिकरणका अनुसार क्षतिग्रस्त माथिल्लो तामाकोशी जलविद्युत केन्द्रको पुनः निर्माणको विस्तृत डिजाईनको काम एनईए ईन्जिनियरिङ कम्पनीले गरिरहेको छ । पुनः निर्माणमका लागि ९ महिना लाग्ने अनुमान गरिरएको छ ।
हाल बाढी पहिरोले थुपारेको गिट्टी र गेगरान हटाउने काम अघि बढेको र आंशिक विद्युत उत्पादन गर्न पहल गरिरहेको केन्द्रका प्रमुख कार्यकारी अधिकृत मोहन प्रसाद गौतमले जानकारी दिनुभयो ।
त्यसैगरी, प्लानिङ साईटमा रहेको ढुंगा र थुपारेको स्प्रे हटाउने काम हाई हिमालयन ईन्जिनियरिङ कम्पनीले गरिरहेको छ । जलविद्युत केन्द्रको बाँधस्थलमा गत असोज १२ गते आएको बाढी पहिरोमा परी नेपाली सेनाका दुई जना र कर्मचारी दुई जना गरी चार जनाले ज्यान गुमाएको थियो ।
